احمەت بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىندە «ورەنبۋرگسكي پۋت احمەتا بايتۋرسۋنوۆا» اتتى كىتاپتىڭ تۇساۋكەسەرى ءوتتى. كىتاپتى تاريح عىلىمدارىنىڭ كانديداتى, رەسەي ولكەتانۋشىلار قوعامىنىڭ مۇشەسى, كوپ جىلدار بويى ۇلتتىق جانە ورىس زيالىلارى تاعدىرىن زەرتتەپ جۇرگەن تاتيانا تۋگاي جازدى.
تۇساۋكەسەردە اۆتور كىتاپ مازمۇنى تۋرالى, ياعني احمەت بايتۇرسىنوۆتىڭ ورىنبورداعى جىلدارى تۋرالى الاش قوزعالىسىمەن, سول كەزەڭ وقيعالارىمەن, ورىنبور جانە قازاق تاريحىمەن بايلانستىرا وتىرىپ, ايتىپ بەردى.
«احمەت بايتۇرسىنوۆتىڭ ءىرى قايراتكەر, كەمەڭگەر عالىم بولىپ قالىپتاسۋىنا سول كەزدەگى قوعام, قوعامدا بولىپ جاتقان ءىرى وزگەرىستەر ىقپال ەتتى. ىبىراي التىنسارين ءبىلىم بەرسە, ودان كەيىنگى ورتاسى, زامان وزگەرىستەرى ونى جان-جاقتى دامىتتى» دەدى تاتيانا يۆانوۆنا.
كىتاپ اۆتورىنا تۇساۋكەسەرگە قاتىسقاندار تاراپىنان كوپتەگەن ساۋالدار قويىلدى. ولاردىڭ بارلىعىنا اۆتور جاۋاپ بەردى, اراسىندا پىكىرتالاس تا تۋىنداپ وتىردى. كىتاپتى ورىنبورداعى «بايتەرەك» قايىرىمدىلىق قورى دەمەۋشىلىك جاساپ, شىعاردى. قور ءتورايىمى ساۋلە تايكەشەۆا دا تۇساۋكەسەرگە قاتىستى.
«احمەت بايتۇرسىنوۆ جان-جاقتى تۇلعا. ول قازاقستان تاۋەلسىزدىگىنىڭ باس جاعىندا تۇرعان, ول ءۇشىن كۇرەسكەن ادام ەكەنىن بىلەمىز. الايدا ءبىز بۇل كىتاپتا احاڭنىڭ تەك اعارتۋشىلىق جاعىن عانا قاراستىردىق, ونىڭ ساياسي قايراتكەرلىگىن قوزعاعان جوقپىز. ورىس اۋديتورياسىنىڭ بايتۇرسىنوۆتى بىلە تۇسۋىنە بۇل كىتاپتىڭ وزىندىك ۇلەسى بولادى دەپ بىلەمىز» دەدى ساۋلە سوۆحوزقىزى.
تۇساۋكەسەر سوڭىندا ورىنبورلىق كىتاپ اۆتورى مەن ونىڭ دەمەۋشىسىنە ۋنيۆەرسيتەت باسشىلىعى تاراپىنان قۇرمەت كورسەتىلدى. تۇساۋكەسەرگە قوستانايلىق وقىرماندارمەن قاتار رەسەيدىڭ ىرگەلەس وبلىستارىنان كەلگەن قازاق دياسپوراسى وكىلدەرى دە قاتىستى.
ءنازيرا جارىمبەت, «ەگەمەن قازاقستان»